Inspekcija za državnu imovinu za godinu dana nije sprovela nijednu kontrolu, a inspekcija je u međuvremenu ostala bez inspektora, jer su raspoređeni na druga radna mjesta ili im je prestao mandat.
Inspekcija za državnu imovinu ne funkcioniše od oktobra 2023. godine. Ova inspekcija je izmjenom vladine Uredbe od oktobra 2023. godine prešla u nadležnost Ministarstva prostornog planiranja, urbanizma i državne imovine. Do tada je, od 2010.godine, po slovu Zakona o državnoj imovini, funkcionisala u okviru Ministarstva finansija. Izmjene organizacije vlade nisu uvažile zakona o državnoj imovini koji je propisao da se o njiegovoj primjeni stara ministarstvo finansija. Tako je inspekcija ostala između zakona i uredbe, između dva ministarstva, a inspektori bez ovlašćenja za rad.
Od oktobra 2023. do juna 2024.godine vlada nije preduzela mjere da se riješi nesaglasnost odredbi zakona i uredbe. Tek u junu vlada je utvrdila predlog izmjena zakona o državnoj imovini kojim se mijenja nadležnog ministarstva, odnosno usaglašava zakon sa uredbom ali predlog nije usvojen u Skupštini, jer se većina poslanika usporotivila predlogu amandmana vlade i poslanika vladajuće većine.
U oktobru 2024. godine, u inspekciji za državnu imovinu nema inspektora, dva inspektora su preraspoređena, dok je trećem istekao mandat.
U januaru 2023.godine u Direkciji za inspekcijski nadzor nad državnom imovinom bilo je pet inspektora za državnu imovinu. Nadzore u 2023. godini je sprovodilo četiri inspektora, jer je jedan inspektor za državnu imovinu u februaru 2023. godine radni angažman nastavio u Opštini Bar. Od januaru 2024. godine, u inspekciji za državnu imovinu nema glavnog inspektora i nadzor su sprovodila tri inspektora.
Direkcija za inspekcijski nadzor nad državnom imovinom kontroliše sprovođenje Zakona o državnoj imovini, Uredbu o prodaji i davanju u zakup stvari u državnoj imovini i Uredbu o evidenciji pokretnih i nepokretnih stvari i o popisu stvari u državnoj svojini. Inspekcija za nadzor nad državnom imovinom kontroliše raspolaganje nad državnom imovinom i drugim dobrima koja pripadaju Crnoj Gori ili lokalnoj samoupravi kod ministarstava i drugih organa uprave, državnih organa, organa lokalne uprave, Glavnog grada, Prijestonice, javnih ustanova. Inspekcija za državnu imovinu takođe kontroliše način, postupak, zaključenje ugovora i uslova pod kojim su sprovođeni postupci davanja u zakup ili na korišćenje nepokretnosti u državnoj svojini.
U 2023. godini inspekcija za državnu imovinu je sprovela 36 inspekcijskih nadzora. Nije bilo inspekcijskih nadzora koji su konstatovali uzurpiranje državne imovine. Osim jednog nadzora kada su inspektori obišli četiri ambulante u JZU Dom zdravlja u Kotoru, nije bilo nadzora u kojima se konstatuje stanje u kojem se nalazi državna imovina.
Prilog na TV Vijesti i komentar naše Dragane Jaćimović na ovu temu.
Inspekcije pratimo u okviru projekta Inspekcije bez protekcije: Saveznici u borbi protiv korupcije, koji sprovodimo uz podršku Ambasade Sjedinjenih Američkih Država u Crnoj Gori, Biroa Stejt dipartmenta za borbu protiv međunarodne trgovine drogom i sprovođenje zakona (INL). Sadržaj je isključiva odgovornost Instituta alternativa, i nužno ne odražava stavove Vlade Sjedinjenih Američkih Država.
